PANIRA

Sa mga nangyayari ngayon, bigla naisip ko, para sa akin ay parang totoo nga na si FPRRD, ang mga Dutertes, at ang mga DDS ang sumira sa bansa. Sa palagay ko ay sila ang wumawasak sa Pilipinas dahil lahat ng hatid nila ay mga gulo, kalituhan at kaisaraan. Ang mga gulo ang kabuntot nito ay sila. Ang dami ngayon mga lumalabas na anomalya dahil wala na si FPRRD sa poder para pigilan o pagtakpan ang paglabas ng mga ito. Kung bakit ang mga ito ay nangyari dahil sa mga ito:

1. Ginawa niyang masama ang mga tao. Kung dati ang kasamaan ng isang tao ay patago, sa panahon niya ay nagsimula ng lumakas ang loob at ipakita ng mga tao ang magbanta sa buhay ng kapwa, wagas na magmura, harapang pulaan ang relihiyon, mang-away, at walang takot na ipakita ang pangit na ugali sa katwirang nagpapakatotoong-tao lamang daw sila.

2. Inilayo niya sa Diyos ang mga Katoliko. Sa panahon niya ay nagawa niyang paniwalain ang mga tao na magalit sa mga pari, baluktotin ang katuruan ng Katoliko-Kristiyanismo at karapatang pantao, at gawing tama lang ang pumatay.

3. Inilubog niya sa utang ang Pilipinas. Ang taon-2020 ay pinakamalaking drepresyon ng Pilipinas, ginamit ang pandemya upang makautang kabi-kabila upang pagkakitaan at politikahin ang mga tao sa ayuda, facemask, at kahit hanggang sa bakuna. Nagpasasa sa pera ang kanyang mga chronies, ginipit ang ibang oligaryo upang bumuo ng kanyang oligaryo.

4. Inilalagay niya ngayon sa peligro ang integridad ng Hukbong-Lakas at Korte Suprema dahil sa pagkaroon ng mga bumubuo dito ng mga hepe at mahistrado na personal na malapit sa kanya. Ngayon ay nararamdaman ang dulot nito sa mga ilang malalaking isyu na nagliligtas sa kanya.

5. Ibinugaw sa Tsina ang bansa, mas pinaboran ito, ang mga tao nito at ang sitwasyon nito. Pinapasok ang mga walang dokumentong dayuhang-Tsino-gawing legal daw, binigyan ng mas magandang trabaho, ipinaubaya ang WPS, Boracay, kinampihan ang mga bumabangga sa barko ng Pilipinas, at ipinagkait niya ang karapatang ipinanalo ng bansa sa The Hauge. 

6. Pinairal niya ang karahasan. Sa likod ng akala ng mga tao na tahimik at ligtas na sa mga kriminal ay laganap ang krimen ng madugong giyera kontra droga laban sa mga walang kalaban-labang mga maliliit at mahihinang tao, ginawa niyang uhaw ang mga pulis sa pagkitil ng buhay kapalit kabayarang presyo at itinaas na pasuweldo.

7. Ginulo ng troll farm niya ang mga tao. Dumagsa ang mga pekeng balita na nagpalito, nagpagulo, at nagbulag sa mga tao. Nag-away at nagkawatak-watak ang mga Pilipino.

Sa kabilang banda, ang kanyang mga alipores at mga bulag na taga-suporta ang nagbigay-basbas para mangyari ang pagsira sa bansa. Sila ang problema dahil kung ang kalidad at pamantayan ng kanilang pag-iisip at pagdedesisyon ay ganito, walang duda na sila ang sumisira sa bansa dahil ang mga pinilili nilang politiko na suportahan ay mali dahil sa una pa lang ay mali na ang batayan nila, kaya lalong bumababa ang kalidad ng mga halal na politiko, kaya lumalala ang korapsiyon, at kaya lumulubog ang bansa. Hindi ba't sinira nila ang otso-deretso upang maghari ang mga ka-uri nilang bulag na alipores at napahamak ang bansa sa mababang-uri ng mga politiko? Hindi ba't ipinahamak ulit nila ang bansa nang mabudol sila ng uni-team na siyang puno-t dulo ng gulo at anomlaya ngayon? Sinira ng mga bulag na taga suporta ang bansa dahil sa kakapusan sa pang-unawa kung kaya ginamit sila ng mga trapong-politiko dahil alam nilang mapapakinabangan nila ito sa mga pansarile nilang interes. Kaya hanggang naririyan sila, ang bansa ay magiging sira at magdurusa sa mga kamalian nila na damay ang iba na may matino na pag-iisip.

WAG CO-KURAP

(huwag kang kukurap, huwag kang kasabwat ng kurap)

Sa isang mahirap na bansa na tulad ng Pilipinas ay pahirapan talaga ang mamuhay kaya natutukso ang mga tao, mayaman, mahirap, may trabaho at wala, na gumawa ng mas malaki at mas mabilis na pagkakakitaan kahit sa paraang illegal. Dahil gusto ng mga tao ay mabuhay at ang mabuhay ay matira ang pinakamatibay kaya lumalaganap ang mga katiwalian at krimen.

Nuon pa ay may korapsiyon na, matagal na itong nangyayari. Sa tagal nga ay tinatanggap na ito na parang nasanay ng nariyan lang na bahagi na ng buhay, sistema, at ugali. Marami ng mga anomalya ang nabulgar, pinag-usapan, hanggang makalimutan kapag mayroon na namang ibang anomalya ang mababalitaan. Walang napaparusahan kaya ang mga tao na sangkot ay nakakaalis, may nagpapatuloy ulit, may napapaganda pa ang katayuan dahil nariyan pa rin ang kapanalig na nakikinabang din sa korapsiyon. Paulit-ulit lang, magkakaiba lang ng mga tauhan at halaga kung magkano ngunit pare-pareho ang mga kuwento ng pagkamal ng limpak na salapi. Ang mga sangkot: politiko, mambabatas, ahensiya, trabahador at ordinaryong tao lahat ang pakay ay kumuha ng pera mula  sa kaban ng bayan na pang-serbisyo sana sa taumbayan. Paulit-iulit, paikot-ikot at walang katapusan, kung mayroon lang sana kinahahantungan ang mga imbestigasyon para maparusahan ang mga sangkot maging sino man sila.

Bata pa lang tayo ay naririnig na natin ang salitang korapsiyon. Ngayon, mas nagiging sistematiko, mas lumalala, mas dumadami. Matagal na ang korapsiyon, hindi lang sa flood control, TUPAD, 4Ps, ayuda, sa halalan. Hindi lang sa DPWH, sa Custom, Philippine Sports Commission, sa DepEd, sa DOH, kahit sa mga lokal na munisipyo, opisina ng baranggay at mga organisasyon ng mga maliliit at ordinaryong tao tulad ng mga TODA, homeowners at religious group. Ganito kalawak, katalamak at kalala ang korapsiyon sa Pilipinas na pinagtibay na ng panahon dahil walang napaparusahan, dahil tinatanggap na ng mga taumbayan, at dahil sa ugali ng tao na materyalismo at hindi marunong makuntento. Maraming tao ang walang kasiyahan at walang kabusugan. Hindi sa kasuwapangan dahil nakikihati siya sa kapwa niyang katulad din niya ngunit hindi lang talaga sila makuntento na kailangan pa nilang ulitin at ulitin ulit hanggang nabubuhay. Hindi totoong kapag mayaman ay hindi na magnanakaw dahil hanggang ang tao ay makamundo, sisiguraduhin niyang magpalakas upang maipaglaban niya ang kanyang kapangyarihan dahil ang materyalismo na ito ay nagiging simbolo ng magandang buhay.

Nakakalungkot dahil maingay lang tayo ngayon dahil bago ang balita pero lilipas din ito. At habang ang nakararaming taumbayan ay hinahayaan na lang dahil masaya na silang mabibiyaan kahit kaunti at sandali, maging buhay-pasko paminsan-minsan dahil sanay na sila sa hirap, dahil wala naman daw mangyayari, dahil wala naman daw silang magagawa, dahil pare-pareho lang naman ang mga iyan. Matagal ng ganito ang katwiran ng marami kaya lumala ito, kaya hindi matapos ito, at kaya iyung mga tiwali ay mas lumakas at mas kampante.  Pero hindi dapat ganito, sana huwag natin tanggapin na lang dahil kung ganito ay korap na rin tayo. Hindi dapat hayaan ang korapsiyon. Dapat sa katawagan pa lang ay pandirihan na ang korapsiyon. Kailangan magalit tayo sa korapsiyon, paka-ayawan natin ang gawaing ito, maging kahihiyan ang madawit dito, at maging sumpa ang gumagawa nito. Marami ng tao ang namatay dahil dito, ilang tao na ang hindi makapagpagamot dahil sa korap na serbisyong-medikal. Ilang tao na ang nawalan ng magandang kinabukasan dahil hindi nila natikman ang mapaglingkuran sila ng bayan. Ilang bata na ang hindi nakapag-aral dahil sa bulok na sistema ng edukasyon? Ilang tao na ang nawalan ng pag-asa dahil ang mga oportunidad ay nako-korap? Sa laki ng mga ninanakaw sa atin ay mapapaisip ka na kaya naman pala ng Pilipinas na sumabay sa makabagong teknolohiya tulad ng nasa ibang bansa kung ang mga perang nananakaw ay napupunta sa tama. Kung tutuusin ay kaya naman pala natin na gumastos din ng malaking pera para magkaroon tayo ng transportasyong pang-publiko na pang-daigdigan ang kalidad, tulay na katulad sa mauunlad na bansa, makabagong ospital sa abot-kayang gamutan, o pensiyon mula sa gobyerno pero hindi mangyari-yari ang mga ito dahil sa korapsiyon.