BATAS KONTRA SA PAG-ABUSO SA KARAPATANG PANTAO

Salamat at nakakuha ako ng kakampi na nagpapatunay na ang paniniwala ko sa pagpatay ng tao ay kaylan man ay hindi tama at ang pagtatatanggol ko sa karapatang pantao ay tama talaga.  Salamat Amerika, Canada, Australia at mga bansang-Yuropa sa inyong pagmamalasakit sa buhay ng tao.  Kung hindi ko man makuha sa sarili kong bansa ang paniniwala kong ito, salamat at may mga ibang malalaking bansa na umaayon sa aking pananaw.  Dahil hanggang naghahari ang mga uri ng tao ngayon sa Pilipinas ay hindi makakamtan ng bansa ang hustisya kaya mabuti na lamang at mayroong isang tulad ng Amerika

Sabihin man ng kapwa ko Pilipino na may ibang intensyon ang Amerika sa pagpapalawig ng batas, sa dulo nito ay sapul na sapol naman nito ang pinakaakahulugan tungkol sa karapang-pantao.  Sa sinasabi ng ibang tao na ito ay panghihimasok sa panloob na pangyayari sa ating bansa, pag-isipan sana nila na ang karapatang pantao ay protektado ng buong mundo (universally protected).  Sa ayaw at sa gusto mo, papasok at papasok ang United Nation dahil ito ay usaping pang-buong mundo.

Kung ang paniniwala mo ay walang masama sa nangyayaring sistema sa Pilipinas dahil ikaw ay maka-kasalukuyang administrsyon at marami kayong magkakampi, bakit ngayon ang paniniwala ko ay tumutugma sa mas malalaking bansa?  Ikaw na siguro ang may dipresensiya.  Hindi naman siguro mangmang ang mga iyan.  Kung ikaw na isang maliit at ordinaryong tao, ano ang kaaalaman mo kumpara sa naglalakihang institusyon at mga bansa na ito?  Kung ang iyong paniniwala ay kayo-kayo rin lang ang nagkakaisa at labas ng grupo ninyo ay marami ang hindi sumasang-ayon, baka kayo na nga ang may dipresensiya.

Tama lang ang makabagong batas na ito dahil kung hindi kayang usigin ang mga makapangyarihang taong sangkot sa paglabag sa karapatang pantao dahil sa kanilang tinatawag na impunity, labanan sila sa pinakamasasaktan sila – sa laman ng kanilang bulsa, pitaka at bangko: PERA.  Hindi sapat ang pagkaitan lang sila na makapasok sa mga bansang pinakagusto nilang puntahan tulad ng Amerika, Canada, Australia at sa Yuropa kundi dapat din pigilan ang kanilang mga ari-arian na nasa ibang bansa. At para sa mga maliliit na mamamayan na sumobra ang pagkapantiko, dapat din siguro na suriin ang kanilang mga ginagawa sa social media upang makilala kung sila ba ay totoong makatao, may puso at hindi nagmamaka-makabayan lamang.

Simula pa nuong 2016 ay kinokondena ko na sina Mocha, Sassot, Nieto, Mr Riyoh at iba pa sa kanilang mga balitang-peke at pagdedepensa sa mga napapatay na pinaghihinalaang nagbebenta ng bawal na gamot.  Dahil kahit kailan ay hindi ako pabor sa pagsusulat ng kasinungalinan kapalit ng pera at kapangyarihan.  Mas gugustuhin ko pa ang magsulat ng aking niloloob kahit ito ay mali sa paniniwala ng iba kaysa ibenta ko ang respeto sa sarili.  Bawiin man nila ang kanilang mga ginawa, magpaalam man sila sa kanilang social media, sana ay tingnan pa rin ng kinauukulan ang kanilang mga pinaggagawa upang malaman nila kung gaano kasama ang kanilang mga pinagsasabi. 

Salamat at hindi ako isang panatiko, salamat at hindi ako isang bulag na tagasunod, salamat at hindi ako loyalista, at salamat at hindi ako nagpakain sa sistema.