ANTI BA AKO?

Anti o oposisyon ba ako kay Pangulong R. Duterte (Du30)?  Hindi.  Kritoko - iyun ang tamang salita. Kapag anti kasi, ito ay puro lang laban at walang pagpapahalaga o pagpapasalamat.  Hindi ako ganun. Ang totoo at alam ito ng mga taong malapit sa akin: IBINOTO ko pa nga si DU30.  Mayroon akong boiler at campaign t-shirt niya nuong panahon ng kampanya.  Hindi pa siya nagsusumite ng kanyang kandidatura ay maka-DU30 na ako.  Kulelat pa siya sa survey nuon ay maka-du30 na ako.  Ang dahilan ko kung bakit siya ang gusto ko siya ay dahil sa kanya ko nakita iyung tapang at totoo sa sinasabi kung kaya pinanghawakan ko iyon upang maniwala akong makakaya niyang linisin ang bansa sa loob ng tatlo hanggang anim na buwan.  Pero mali pala ako.

Tinanggap ko kahit nakakasakit ang mga patutsada ng mga oposiyon na kasama ako sa 16M na na-uto dahil sa jetski.  Kahit marami siyang nagkakasalungat na sinasabi tulad ng simple at mahirap lang siya. Kahit marami siyang ginagawang hindi ayon sa pinapaniwalaan ko tulad ng pagpapalibing kay Marcos sa Libingan ng Mga Bayani, umento sa SSS, pagpapalaya sa mga kaalyado niya sa politika, mga paghihiganti, at kung anu-ano pa.  Maka-DU30 ako kahit hindi ko gusto ang kanyang pagmumura sa telebisyon, pambabastos sa mga babae, ang paghikayat niya sa patayan, at ang halatang pagpabor niya sa China. Maka-du30 ako pero hindi lahat ng gusto niya ay tinatangkilik ko tulad ng pagsisinungalin niya sa paggawa o pagtahi-tahi ng mga istorya tulad ng inabuso dw siya ng isang Pari, ang pagimbento niya ng bank account ni Antonio Trillanes.  Idagdag pa ang pagiimbento o pagbigay ng ibang depenisyon ng batas upang umayon sa politikal na interes niya.  At hindi lahat ng kontra sa kanya ay inaaway ko sa social media at nagkumumento pa man din ng masasakit na salita (na parang pang-kanto) sa mga oposisyon tulad ni Bise Presidente Leni, Trillanes, sa mga Aquino, Liela Delima, Simbahang Katolika, atbp.

Maka-DU30 ako pero hindi na ngayon.   Mabuti na lang hindi ako ang tipo ng tagasuporta na panatiko.  Mula nang tinawag niyang istupido ang Diyos, nang hinamak at kinutya niya ang Diyos, nang hayagan niyang kinondena ang mga aral ng Diyos para lang himukin ang mga taong mahihina ang pananampalataya na iwanan ang Kristiyanismo o Katolisismo, iyun ang naghudyat sa akin na itigil ko na ang pagiging maka-DU30.   KUNG KAHIT ANG DIYOS AY NAGAWA NIYANG TARANTADUHIN, GAANO NA ANG PILIPINAS? Gaano pa kaya ang mga tao? Gaano pa kaya ako?  Nakakatakot kung ang Diyos na ang hinamak niya, anu pa kaya ang kaya niyang gawin?

Nang inamin niyang "gawa" niya lang ang sinabi niyang kaya niyang linisin ang krimen at droga sa Pilipinas sa loob ng tatlo hanggang anim na buwan, napahiya ako sa sarili ko at sa mas nakararaming 34 milyong ayaw sa kanya na hindi siya ibinoto.  Ang pakiramdam ko ay literal na na-uto ako pero niloko lang pala niya ako.   Ang naniwala ako sa kanya, ito ang isa sa pinakamalaking pagkakamali na nagawa ko.  Kasi iyun talaga ang dahilan kung bakit ko siya ibinoto.  Hindi ko na tiningnan ang kanyang edukasyon, karunungan, at ibang negatibong balita dahil nanalig ako sa kagustuhan kong maging payapa na ang bansa ngunit maling-mali ako.  May mga pinuri akong ginawa niya dahil kung tama at maganda ay kailangang pasalamatan dahil hindi dahil hindi ka maka-DU30 ay mali na lahat ang paningin mo sa kanya.  May mga nagugustuhan pa naman akong mga ginagawa niya ngunit nagkataon na mas marami na akong hindi gusto sa mga nakikita at kailangan ko itong punahin.

Ikaw, kung duble ang pamantayan mo na kapag ikanenegatibo ng oposisyon ay mabilis inaaksiyonan pero sa kapanalig ay hindi (hal. Nahatulang Imelda Marcos ngunit malaya habang si Delima na hindi pa napapatunayan ay nakakulong, si Bato na hindi nagbiyan ng US visa ay mabilis na iginanti sa pamamag-itan ng pagkansela ng VFA habang ang pagbabawal sa pagpasok ng mga galing ng China dahil sa COVID ay mabagal at huli na), kung lahat ng ayaw kay DU30 ay kaaway mo rin, kung sa kabila nito ay pinapanigan mo pa rin, kung tulad ka rin ng pinagdaanan ko ay maka-DU30 ka pa rin, ano ka na sa palagay mo, ka pa ba PANATIKO niyan?  Tama man mo mali ang iyong interpretasyon, hindi pagiging anti kung ikaw ay pumupuna upang ipaalam mong may nakakakita sa mga nangyayari.  Ang mahalaga ay may mga matang nagmamatiyag sa kanila upang sila ay maging maingat.
16MvsMe

NASAAN AKO NUONG EDSA-1?

Kasalukuyang estudiyante ako nuong mga panahon na iyon at nasa bayan lang namin ako. Gustong-gusto kong magpunta sa EDSA at sumama sa dumaraming tao na naroroon ngunit limitado lang ang pera ko at ayokong maapektuhan ang pag-aaral ko dahil alam kong ang mga magulang ko ay iginagapang sa hirap ang pagpapaaral sa akin. Ngunit nakatutok ako nuon sa mga nangyayari. Interesado kong hinihintay ang mga mangyayari bawat araw, nakikinig sa radyo at nanoood ng balita sa telebisyon mula sa unang-araw hanggang sa ika-apat na araw ng EDSA-I, at ipinagdadasal na mapaalis si Marcos sa puwesto. Habang nagkakagulo ay tuloy ang klase naming nasa karatig-lugar ng Maynila – tuloy ang aral. Naka-sakay ako nuon sa jeep at pinapakinggan ang balita sa radyo na dumadami na nga ang mga taong nagpupunta sa EDSA. Ipinapakita sa telebisyon ang mga madre na nagdadasal, ang mga sundalo na nakabantay, at ang mga tao na said na sa pagtitiis at nagkaisang magrebolusyon. Alam kong laman na rin ng balita sa ibang bansa ang nangyayari sa Pilipinas at gustong-gusto ko na talagang maki-isa ngunit ayokong saktan ang mga magulang ko kung malalaman nilang lumilibn ako sa aking klase.

Hanggang narinig ko sa radyo na pinupwersa na ang pamilya-Marcos na umalis ng Malacanan. Nanindig ang mga balahibo ko nuon dahil ang pakiramdam ko ay nangyayari na ang isang Kasaysayan. Mabilis ang mga pangyayari, maya-maya lang ay ipinakita sila sa TV na nasa balkonahe ng Palasyo, kumakaway at nagpapaalam. Muli ay naninidig ang mga balahibo ko dahil iyung gustong-gusto kong mangyari na mapaalis sa pwesto si Marcos ay natutupad na. Hanggang ibininalita sa tv ang pagpasok ng mga tao sa Malacanan dahil nalaman ng mga tao na palihim na tumakas ang mga Marcos papunta sa Amerika. Sobra akong kinilabutan nuon dahil sa tuwa at saya. Pakiramdam ko sa wakas ay wala na ang mga taong dahilan kung bakit ang mga tulad naming mahihirap ay hirap sa pagpapaaral, hindi makakakain ng masasarap at alipin ng kahirapan sa taas ng presyon ng bilihin at pamasahe. Tuwang-tuwa ako dahil nakawala na sa pamumunong kontrolado kung ano ang gusto o hindi gusto mula sa mga gabinete hanggang sa mga dapat mangyari. Iyung pakiramdam ng naranasan mo yung magkaroon ng bagong Presidente na sa buong buhay mo ay iisang tao lang ang inabutan mong President.

Madalas pinapatugotog sa radyo o telebisyon ang “Magkaisa” ni Virna Liza, “Handog ng Pilipino sa Mundo” at ang “Bayan Ko” na nagpapaalala na kayang gawin ng mga Pilipino ang lahat para sa kanyang bayan. Naninindig ang mga balahibo ko dahil hindi ko akalain na kayang patalsikin ang isang napakalakas na tulad ng mga Marcos. Iyung nakikita mo tuwing umaga ang ulo ng balita sa diyaryo tungkol sa ginawang pag-aaklas ng mga Pilipino, ang larawan ng milyon-milyong tao, ang pagbati sa Pilipinas ng ibat-ibang bansa – ang pakiramdam mo ay napakasarap maging Pilipino, at tunay na maninidig sa tuwa ang iyong balahibo sa ganitong mga balita. Ang taas ng tingin ko nuon sa mga Pilipino dahil sa ipinakang tapang, malasakit, dedikasyon at makabayan.

Mula nuon, kada umaga ay isa-isang laman ng balita ang mga natutuklasang lihim mga Marcos tulad ng napakaraming sapatos ni Imelda, mga mamahaling obra, ang marangyang buhay ng mga Marcos, mga anomalya sa gobyerno at ang katotohanang bangkarote ang kaban ng bayan. Ang natatandaan ko ay nasa mahigit 20 pesos ang isang dolyar bago magkaroon ng People’s Power – palatandaan na mahina ang ekonomiya ng bansa. Bakit ngayon ay sinasabi ng mga loyalista na mayaman ang Pilipinas bago maging Pangulo si Cory Aquino? Ang mga naiwang loyalista ay panay ang parinig na sinasabing magiging komunista na ang Pilipinas na hindi naman nangyari. Kailangang magpatuloy ang buhay, kahit mahirap ang naging simula ng bagong administrasyon dahil naparaming mga balakid ang dapat ayusin at problema na iniwan ng mga Marcos kaya mauunawaan mo kung nagtaas ang presyo ng ilang bilihin.

Kakaunti lang din naman ang nakakaluwag sa buhay nuon kaya sigurado karamihan sa magulang ng mga kabataan ngayon ay pinagdaanan din ang katulad ng aking sentimiyento. Dumaan din sa hirap at pinangarap din ng mga nanay at tatay ninyo ang makakawala sa mga kamay ni Marcos, nuon pa man ay nagalit din sila sa mga nangyayari nuon at minsan din silang ipinaagdasal ang katapusan ng panahon na iyon. Kaya sa mga kabataang sinisisi ang EDSA-1, huwag maging ingrato, mangmang at alamin ang kasaysayan. Kung mahirap at magulo ang bansa ngayon at kung marami pa ring korapsiyon, iyun ay dahil sa mga taong hindi nagbago mula sa mga politiko hanggang sa mga botante. Huwag mong sisihin ang EDSA-1 at si P.Cory dahil sila ang nagbigay sa iyo ng kalayaang tinatamasa mo ngayon na siyang sinasamantala mo. Nakapaglagay man ng mga tiwaling opisyal sa mga inabusong kagawaran ng gobyerno pero kung sa puso nila ay hindi isinabuhay ang diwa at aral ng EDSA, at wala silang pagbabago, hindi na yun kasalanan ng EDSA-1. Nagpalit man ng rehimen ngunit ang mga mamamayan ay wala pa ring paki-alam sa batas-trapiko, pagkakalat ng basura at kamangmangan sa pag-boto, hindi na yun kasalanan ng EDSA. Kung sa loob ng termino ni P.Cory ay nakisama rin ang mga tao na magbago, siguradong ngayon ay nararanasan mo na ang kaginhawahan ng bansa.

Nasaan ako nuong EDSA-1? Nasa aming bayan habang kinakabahang sinusundan ang mga pangyayari at sinusuportahan ang mga ipinaglalaban ng EDSA-1. Hindi man nangyari ang kagustuhan kong maging bahagi ng EDSA-I ay natupad naman ang kagustuhan kong matapos ang pagmamalabis ng mga Marcos. Alam ko na hindi ako papayagan ng aking mga magulang dahil iba ang sitwasyon nuon kapag sumasama sa rally. Hindi tulad ngayon na wala kang katatakukang kamatayan kapag nagpapahayag ka ng saloobing-politikal dahil ito sa  demokrasyang ibinalik at ipinamana ni P.Cory.

SALOOBIN SA SITWASYON NG ABS-CBN

Saan ba talaga nagmumula ang galit ng mga Die-hard Duterte Supporters (DDS) sa ABS-CBN? (Or sa mga Aquino, Simbahang Katolika, CHR, America, etc.). Mga loyalista ng mga Marcos - galit, kapatiran ng isang sekta ng relihiyon – galit, mga taga-Davao/Mindanao – galit.  Ang mga DDS ay pagsasanib ng mga maka-Marcos, maka-Gloria, maka-Erap at galit ang mga ito sa ABS-CBN.  Ang mga sinasabi nila: hindi daw nagbabayad ng tax ang ABS-CBN.  Sinagot sila ng pamunuan ng kumpnya na wla silang utang sa buwis at katunayan pa nga ay binigyan sila ng clearance ng BIR nung 2019.

Bias daw. Di ko alam kung paanong bias. Kung anu naman ang lumabas sa bibig ng Pangulo, kung ano ang mga ginawa ng mga nasa paligid ng Pangulo ay iyun din lang naman ibinabalita. Dokumentado naman. At kung ano ang ibinabalita ng ibang channel, diyaryo at radio ay yun din ang ibinabalita niila, pero bakit sine-single out nila ang ABS?  Yun daw paraan ng pagbabalita, kung paano ipakita, paano ibalita – bias daw.   Hindi kaya sila na ang bias dahil ang utak nila ay nakahulma na’ng anuman ang sabihin ng mga hindi nila gusto ay para sa kanila masama.  Kapag masama kasi ang nasa isip mo, masama ang mga papasok na enerhiya sa mga nakikita o naririnig mo at masama talaga ang lalabas sa iyo.

Dahil oligarko daw ang mga Lopez na may-ari ng ABS-CBN.  Pero hindi naman sila tutol sa mga kapanalig na oligarko ng Pangulo.

Utang?  Bagamat wala akong alam sa akusasyon na ito at hindi ko ito sasagutin.  Ngunit habang lahat ng malalaking kumpanya ay may utang, at sa teyorya ng accounting ito ay walang mali. Hindi naman pipitsugin ang mga CPA ng malalaking kumpanya kumpara sa mentalidad ng mga panatiko.  Habang may mga kumpanyang may mga utang ay narerenew ang prangkisa, bakit hindi ang ABS?  Kailangan kong hintayin ang paliwanag.

Habang may ibang kumpanya at indibidwal ang hindi nagbabayad ng buwis (o ng tamang buwis) tulad ng Pogo, si Manny Pacquiao, ito pa bang ABS na kasama sa top-200 na tax payer ng bansa?

Magpakatotoo tayo: galit sila sa ABS-CBN (sa mga Aquino, Simbahang Katolika, etc.) kasi galit si DU30 dito. Kung ito na lang sana ang sinasabi nila ay mas maniniwala at maiintindihan ko pa sila. “Eh kasi galit si DU30 sa ABS-CBN kaya galit na rin kami” – yun!.  Huwag ng sabihin bias daw, may utang, may minanamaltratong trabahador, at kung anu-ano pa – nagkakasala pa sila niyan dahil nangbibintang sila. Sabihin na lang nila na galit sila kasi galit din si DU30 - tapos. At ganito ang tinatawag na panatiko. Hindi na sila tumitingin sa isyu kundi sa personalidad na. At ganito ang totoong hindi makabayan at traydor sa bayan.

Napakasimple: Anumang bagay tungkol sa mga hindi nila kasama ay hindi nila gusto. Kaya kahit anong ganda,kahit anung tama ay hindi nila ito magugustuhan at tatanggapin kundi pasasamain pa nila ito.

Kung ano ang gusto ni DU30 yun ang gusto nila, kung ano ang sabihin ni DU30 yun ang sasabihin nila, kung ano ang iutos ni DU30 yun ang susundin nila. Salamat, hindi ako ganun.

Kaya kahit anung mali sa pagpatay ay ginusto na nila ito dahil yun ang gusto ng idolo nila. Kahit anong galit nila nung araw sa mga pinaggagagawa ng China ay ipinagtatanggol na nila ito ngayon dahil kapanalig ito ni DU30. Kahit mismong Diyos na ang hinamak, kinutya at minamali ay wala silang pakialam dahil sabi nga nila “Duterte pa rin”. Salamat, hindi ako ganun.

Kung tutuusin ay wala namang malaking epekto sa akin kung magsasara ang ABS-CBN. Hindi naman nila ako solid na kapamilya, hindi ako masugid na tagapanood, wala akong hilig sa showbiz, kaya wala naman talaga sa akin ang mga networks na ito tulad ng GMA, TV5, etc. Kaya hindi lumalabas na maka-ABS-CBN ako.  Pero hindi lang naman ako ang tao at hindi lang naman ito dapat tungkol sa akin.  Nagbibigay ako ng saloobin dahil may mga taong naaapektuhan, mawawalan ng pagkakataong makapanood ng mga programa na libre, o malayang makapili ng mga mapapanood.  Mawawalan ng serbisyo-publiko sa mga nangangailangan.  Oo nga’t galing sa mga donasyon ng taong-bayan ang marami sa mga ito, pero hindi ba kitang-kita dito yung tiwala ng mga tao sa ABS-CBN na gamitin sila upang makatulong?  Dahil malawak ang kanilang nasasaklawan, kaya nilang maghikayat, maraming mga tauhan at mayroon silang mga pasibilidad upang miparating ang mga tulong na ito, duon pa lang napakalaking bahagi na sila sa serbisyo-publiko.

Nagbibigay ako ngayon ng saloobin para sa mga tao na nilamon na ng sistema dahil nakikita ko ang kanilang pagmamalabis. Pagmamalabis sa kapangyarihan ng mga politiko at pagmamalabis ng mga taong-tagasunod na nawawala na sa katwiran. Ayokong ugali ng isang tao na kung ano ang gusto niya ay siya ang masusunod kahit hindi na patas, na nakikita ko ngayon sa mga nasa posisyon.  Umuulit ang kasaysayan at naniniwala akong matatapos din ang mga ito, ngunit huwag sanang umabot pa ng dalawang dekada.  Nawa’y makamtan na ng bayan ang gantimpala mula sa ilang taon ng pagtitiis.

#StandWithABSCBN

#ABSCBNFranchise

#NoToABSCBNShutdown