HUWAG KANG MAGSISINUNGALIN

Napakahirap ang hindi magsinungalin, kahit sabihin na pambobola o  iyong pagsisinungaling na hindi nakasasakit ay pagsisinungalin pa rin ang mga ito.  Kaya nating patawarin o hayaan ito, pero iyung pagsisinungalin nang paulit-ulit, iyun ang hindi dapat binibigyan ng isa pang pagkakataon at pamimihasa.

 

KASINUNGALINANG PAULIT-ULIT

May mga tao na dahil hindi niya magawa ang mga dapat niyang gawin ay paulit-ulit siyang nagsisinungalin para palabasing ginagawa niya ang mga dapat niyang gawin ng sa ganon ay katuwaan siya.  Tulad ng kung para hindi magalit ang asawa ay sinasabi sa kanya na hindi mo ginagawa iyung mga ayaw niya kahit hindi totoo.  Gaya ng mga bisyo na paulit-ulit na sinusuway at pinagtatakpan.

 

Paulit-ulit na pagsisinungalin ng mga politikong ang sinabi ngayon ay babawiin sa susunod na araw.  Tulad ng sa una’y sinabing may pambili ng bakuna na naging walang perang pambili.  O kaya’y unang magpapabakuna, sumunod ay ipinapaubaya sa mas nangangailangan ang bakuna, sumunod ay magpapabakuna sa puwet at sinundan na magpapabakuna na.

 

KASINUNGALINANG PANGHIHIKAYAT

Parang iyung mga artistang pinapalabas na may nabubuong pagmamahalan pero ang totoo ay wala naman talaga kundi para lamang sa publisidad, takilya at kasikatan.  Halos buong bansa ang sumubaybay sa Kalyeserye.  Walang pinag-iba sa mga politiko na upang makahikayat ay gagatungan ang mga gusto ng tao tulad ng paglaban sa dayuhang mananakop ng ating teritoryo at pagkastigo sa mga nangungurakot, pero kapag ipinaala-ala ngayon ay sasabihin hindi pala iyun ang gusto niyang sabihin.  Panggagantso, hindi pangako.

 

KASINUNGALINANG PANINIRA

Mga bulaang propeta o propagandista, parehong ipinagangaral ang kabutihan ng kanila, magsasabi ng magagandang salita at ang hindi kapanalig ay ibabagsak upang makahikayat lamang.  Kinasasangkapan ang kaligtasan upang umanib sa kanila.  Parang mga naglipanang pekeng balita, magsisinungalin alang-alang sa kanilang ikabubuti.  Pagsisinungalin na may kasamang paninira tulad ng napakaraming inakusahang kasabwat sa droga upang sirain ang kredibilidad sa publiko, pag-imbento ng account ng bangko, at kahit ang pagsasabi ng gusot sa matrimonyal upang ilagay sa kahihiyan at panghuhusga ng mga tao.

 

KASINUNGALINANG PANG-GAGAGO

Ito ang nakakayurak ng pagkatao, iyung harap-harapan kang niloloko ng iyong asawa tungkol sa kanyang pangangaliwa.  Iyung mga tao na ang pagsisinungalin ay harap-harapan kahit kitang-kita ang ebidensiya ay itatatwa pa rin tulad ng pagsasabing walang nabuong istraktura sa WPS sa panahon ngayon ganung kitang-kita kahit ng taong duling ang mga bagong istraktura sa lugar, sinasabing inilabas ang desisyon ng Hague noong panahon ng nakaraang-administrasyon upang ibaling dito ang sisi, at ang itinatatwang wala daw sinabing pagbawi sa WPS samantalang milyong tao ang nakarinig at nakasaksi nuon sa debate.

 

Kapatid ng magnanakaw ang sinungalin dahil kinukuhanan ka nila ng paniniwala, pagkatao at mga bagay nang hindi mo alam o nang hindi bukas sa loob mo.  Iyung ipinapain ang pangalan, repustasyon o iyung itinataya ang mapangahas na paghahamon tulad ng resignasyon kung mapatunayang siya ay mali, sinisira nito ang isang tao.  Sa una ay may bigat pero kapag higit tatlong beses na binawi o pinalusutan ay nagiging luma at paraan na lamang upang iwasang harapin ang kinasasangkutan na kontroberiya. Mahirap magtiwala sa mga taong ubod ng sinungalin, ganito kahalaga ang tiwala dahil usaping pagtitiwala at tiwala ang nakataya dito.