TAPOS NA

Pagkatapos ng sakit at hirap

Pagkatapos ng isang araw na dumadaing sa pananakit ng katawan

Pananakit na hindi na kayang lunasan

Pananakit na iniiyak dahil walang paraan para maibsan

Ang mga sumunod na araw ay katahimikan

Buong araw siyang nagtulog

Mahimbing, tila nagpapahinga ang napagod na katawan

Tila nagpapahinga mula sa nagdaang  isang araw ng paghihirap

Minsan ay nagdidilat ng mga mata

Pero sandali lang ay muling pipikit upang matulog

Isang buong araw siyang ganon

Walang palatandaan na may dinaramdam

Mabuti naman at tila wala na siyang iniindang pananakit ng katawan

Mabuti at dininig ng Diyos ang aming mataimtim na panalangin

Na sana’y huwag na siyang mahirapan

Na tanging Siya lamang ang makakapagpaalis na hindi kaya ng mga gamot

Nang magkaroon ng pagkakataon ay kinausap ko siya

Sinabi kong kumapit siya sa Diyos

Magdasal

Huwag na niya kaming alalahanin

Kundi ang tanging sarili na lang niya ang kanyang isipin

Intindihin na lang ang kanyang sarili na huwag ng masaktan

Sinabi ko sa kanyang mahal na mahal namin siya

Sinabi ko sa kanya na mahal ko siya

Pagkatapos ng isang araw na pasakit

Ang tatlong araw na sumunod ay kaginhawahan

Tatlong araw siyang natutulog lamang

Na may paminsan-minsang pagdilat ng mga mata

Sa kanyang mga huling oras

Tila ba naghihintay na lamang ng tamang oras

Hanggang sa siya ay tuluyan ng lumisan

Tuluyan na siyang tumigil sa paghinga.

Wala ng sakit, wala ng paghihirap

Napaka-payapa niyang lumisan

Napakatahimik

Napaka-gaan sa loob

Walang pag-iyak mula sa kanya

Walang pagdaing

Napakapayapa niyang umalis

Natupad na ang hinihiling niya

Ng mapayapang pag-alis.